पानाचा विडा आणि सुपारी कायम …तर राजाही कायम का ? काय आहे याचा अर्थ ?
बुलढाणा, 10 मे (गुड इव्हिनिंग सिटी) : जिल्ह्यातील भेंडवळ येथील भाकीताकडे अनेकांचे लक्ष लागलेले होते. 350 वर्षाची परंपरा असलेल्या घट मांडणीचे आज भाकित जाहीर करण्यात आले. काल 10 मे रोजी अक्षय तृतीयेच्या मुहूर्तावर घटमांडणी कण्यात आली होती. या भाकितमध्ये शेतकर्‍यांचं पीक नियोजन तसेच राजकीय घडामोडीबाबत भाकित दर्शवलं जातं. मात्र, यावर्षी देशात लोकसभा निवडणूक सुरू असल्याने पीक पाणी आणि शेतकर्‍यांच्या पिकाबाबतचे भाकित जाहीर करण्यात आले. राजकीय भाकीत जरी वर्तविण्यात आले नाही पण राजा बदलाणार की कायम राहाणार हे दर्शविणारा पान विडा कायम असल्याने राजा बदलणार नाही अशी शक्यता आहे. आज सकाळी भेंडवळ येथील भाकितात यंदा बरा पाऊस असेल. पहिल्या महिन्यात म्हणजेच जूनमध्ये कमी पाऊस असेल. दुसर्‍या महिन्यात म्हणजेच जुलैमध्ये सर्वसाधारण, तर तिसर्‍या महिन्यात ऑगस्टमध्ये भरपूर पाऊस पडेल. चौथ्या महिन्यात म्हणजेच सप्टेंबरमध्ये अवकाळीसह बरा पाऊसमान असेल, असं भाकित वर्तवण्यात आलं आहे.
यंदा तुरीचे अनिश्चित उत्पादन, कपाशी ज्वारी, सर्वसाधारण, मुग-उडीद सर्वसाधारण, बाजारी सर्वसाधारण, तर तीळ पीक चांगले असेल, तसेच पिकांवर रोगराई असेल. साळीचे अर्थात भाताचे पिक चांगले असेल असाही अंदाज भेंडवळच्या या घटमांडणीत केला आहे. अंबाडी कुलदैवत असून मोघम पीक येणार, रोग राई येणार नाही.
रब्बी पीक गहू भरपूर येणार आहे. भावात तेजी असेल असा अंदाज वर्तविण्यात आला. हरभरा चांगले येईल पण भावाबाबत अनिश्‍चता वर्तविण्यात आली आहे.
काल अक्षय्य तृतीयेला चंद्रभान महाराजांचा जयजयकार करीत त्यांचे वंशज पुंजाजी महाराज तथा त्यांचे सहकारी सारंगधर महाराज यांनी सूर्यास्ताच्या वेळी ही घटमांडणी केली. गावालगत असलेल्या शेतामध्ये ही मांडणी करण्यात आली.
यावेळी मातीचा एक भला मोठा घट तयार करण्यात आला. त्यामध्ये अंबाडी, गहू, ज्वारी, तूर, उडिद, मूग, कपाशी, करडई, हरभरा, जवस, भादली, तांदूळ, वाटाणा, मसूर, बाजरी इत्यादी 18 प्रकारची धान्य ठेवण्यात आली. त्याचबरोबर गटाच्या मधोमध एक खड्डा खोदण्यात आला. त्यामध्ये चार ढेकळे ठेवून त्यावर पाण्याने भरलेली घागर ठेवण्यात आली. घागरीवर पुरी, सांडई , कुरडई, पापड, भजी, वडे आदी खाद्यपदार्थ ठेवण्यात आले. अशाप्रकारे घटमांडणी केल्यानंतर पुंजाजी महाराज, सारंगधर महाराज त्यांच्या अनुयायासह परतले. रात्रीच्या वेळी या शेतात कुणीही फिरकत नाही. त्यामुळे रात्रीदरम्यान या घटांमध्ये जे काही बदल घडतात. त्यावरून आज 11 मे रोजी पहाटे 6 वाजता यंदाच्या पीक पाण्याविषयीचा अंदाज जाहीर केला गेला.
