बुलढाणा, २१ जून (गुड इव्हिनिंग सिटी) : जिल्हा काँग्रेसच्या वतीने आज जयस्तंभ चौकात सरकारच्या विरोधात चिखल फेक आंदोलन करण्यात आले. सरकारच्या विरोधात घोषणाबाजी करण्यात आली. काँग्रेस जिल्हाध्यक्ष राहुल बोंद्रे यांच्या नेतृत्वात झालेल्या आंदोलनात विधान परिषदचे आमदार धीरज लिंगाडे व जिल्हाभरातील काँग्रेसचे प्रमुख पदाधिकारी कार्यकर्ते उपस्थित होते. यावेळी काँग्रेस पदाधिकाऱ्यांनी सरकारच्या प्रतीकात्मक पुतळ्यावर चिखल फेकला त्यानंतर पुतळ्याचे दहनही करण्यात आले. सरकारविरोधी घोषणांनी बुलढाणा शहरातील जयस्तंभ चौक दणाणला होता. केंद्रातले आणि राज्यातले सरकार महाभ्रष्टाचारी आणि असंवेदनशील सरकार आहे. जनतेच्या सुखदुःखाशी या सरकारला काहीही देणे घेणे नाही. देशातली, राज्यातली सर्वसामान्य जनता अनेक समस्यांनी अडचणीत असताना सरकार मात्र सत्तेच्या मस्तीत धुंद आहे. लोकसभा निवडणुकीत जनतेचा असंतोष दिसला. थोड्याफार फरकाने ते पुन्हा सत्तेत आले असले तरी केंद्रातले सरकार जास्त काळ टिकणार नाही. राज्यातल्या विधानसभा निवडणुकीत महायुती सरकारची मस्ती उतरवून जनता त्यांना चिखल फासल्याशिवाय सोडणार नाही असा घणाघात यावेळी जिल्हाध्यक्ष राहुल बोंद्रे यांनी माध्यमांशी बोलतांना केला. यावेळी अमरावती पदविधर मतदारसंघाचे आमदार धीरज लिंगाडे, विजय अंभोरे, स्वातीताई वाकेकर, अॅड. संजय राठोड, लक्ष्मण घुमरे, दत्त काकस, प्रा. संतोष आंबेकर, विनोद बेंडवाल मनोज कायंदे व इतर काँग्रेसच्या पदाधिकारी व कार्यकर्ते मोठ्या संख्येने उपस्थित होते.
