बुलढाणा, २२ सप्टेंबर (गुड इव्हिनिंग सिटी) : बुलडाणा तालुक्यातील पाडळी परिसरातील गावांमध्ये आज २२ सप्टेंबर च्या सकाळी ढगफुटी सदृश्य पावसाने थैमान घातले आहे. बुलडाणा जिल्ह्यातील सिंदखेड राजा, देऊळगाव राजा, मेहकर, लोणार व चिखली हे यावर्षी ढग फुटी सदृश्य पावसाचे हॉस्पॉट झाले आहे. आज बुलढाणा तालुक्याचा सुध्दा त्यामध्ये समावेश झाला आहे. बुलडाणा तालुक्यातील पाडळी, गिरडा, चौथा, अटकळ, गुम्मी, व इजलापुर या गावांमध्ये आज २२ सप्टेंबर रोजी सकाळी ढग फुटी सदृश्य पाऊस पडला आहे. यामध्ये पैनगंगा नदीला पूर आला आहे. नदी दुथडी भरून वाहत आहे. पाडळी शिवारातील तलाव तुडुंब भरला असल्यामुळे त्या तलावाचे व पैनगंगा नदीचे पाणी बाजूच्या शेतांमध्ये शिरले आहे. शेतांना तलावाचे स्वरूप आले आहे. या भागात जवळपास दीड तासांपेक्षा अधिक वेळ पाऊस पडला आहे. साधारणता हा 50.80 मिमी पावसाची नोंद झाली असल्याची माहिती तलाठी सौ. यु. आर. इंगळे यांनी गुड इव्हिनिंग सिटीला दिली आहे. अतिवृष्टीमुळे शेतकऱ्यांच्या हाता तोंडाशी आलेला घास हिरावला गेला आहे. कापणीला आलेला उडीद, सोयाबीन व उभ्या असणाऱ्या मका पिकाचे मोठ्या प्रमाणात नुकसान झाले आहे. सध्या स्थितीत शेतांमध्ये पाणी साचलेले आहे. पाडळी विभागाच्या तलाठी सौ. यु.आर.इंगळे सकाळीच नुकसानग्रस्त भागाची पाहणी करण्यासाठी पोहचल्या आहेत. शेतकऱ्यांना तात्काळ पंचनामे करून कुठलेही निकष न लावता मदत देण्याची मागणी शेतकरी करीत आहेत.
