बुलढाणा, ३० नोव्हेंबर (गुड इव्हिनिंग सिटी/रणजीतसिंग राजपूत) ः बुलढाणा जिल्ह्यात नगर परिषदांच्या निवडणूकांचा हाय व्होल्टेज प्रचार सुरु असतांनाच राज्य निवडणूक आयोग काही ठिकाणच्या निवडणूकांना झटका देण्याच्या तयारीत आहे. काल, २९ नोव्हेंबर रोजी राज्य निवडणूक आयोगाने सर्व जिल्हाधिकार्‍यांना न्यायालयीन अपील दाखल झालेल्या नगर परिषदा व नगरपंचायतीमधील सार्वत्रिक निवडणूकांसाठी सुधारित निवडणूक कार्यक्रम-2025 जारी केला आहे. गुड इव्हिनिंग सिटीने या निर्णयाचा प्रभाव बुलढाणा जिल्ह्यातील कुठल्या नगर परिषद निवडणूकांवर होणार आहे, याविषयी सविस्तर माहिती यापूर्वीच्या ब्रेकींगमध्ये दिली आहेच. आज, राज्य निवडणूक आयोगाला बुलढाणा जिल्हा निवडणूक विभागाने डिस्पुट असलेल्या, अर्थात अपील दाखल बाबतच्या नगर परिषदांची माहिती सादर केली आहे. आयोगाने मागविलेल्या माहितीनुसार जिल्हा न्यायालयात दाखल प्रकरणात २३ नोव्हेंबर २०२५ रोजी किंवा तद्नंतर आदेश पारित झालेल्या प्रकरणांत नियमांचे पालन झाले नसल्याने आयोगाच्या निदर्शनास आले असल्यामुळे अशा नगर परिषदा व नगर पंचायतींच्या फक्त संबंधित सदस्यांच्या जागेकरिता आणि अशा नगरपरिषदा व नगर पंचायतींच्या अध्यक्षपदासाठी सध्या सुरु असलेली निवडणूक प्रक्रिया स्थगित करून नियमानुसार पूर्ण झालेल्या टप्प्यांपासून पुढील टप्प्यांसाठी संबंधित नगर परिषद/नगर पंचायतीच्या निवडणूकीचा कार्यक्रम देणे आवश्यक आहे, असे नमूद आहे. त्यानुसार बुलढाणा जिल्हाधिकारी कार्यालयाकडून देऊळगांवराजा नगराध्यक्षपद आणि खामगांव, जळगांव जामोद, शेगांव या तिन ठिकाणच्या प्रभागांविषयीची माहिती देण्यात आली आहे. त्यात खामगाव नगर परिषदेच्या प्रभाग क्रमांक ५ अ, प्रभाग ७ अ, प्रभाग ९ ब, प्रभाग १६ ब तसेच शेगाव नगर परिषदेच्या प्रभाग क्रमांक ४ अ, प्रभाग ४ ब आणि जळगाव जामोद नगर परिषदेच्या प्रभाग क्रमांक ६ अ, प्रभाग ६ ब आणि प्रभाग ७ ब याठिकाणीचे अपील कोर्टात असल्याचे समजते.
देऊळगांवराजा नगराध्यक्षपदाचे अपील काय ? ः गुड इव्हिनिंग सिटीने याबाबतचे वृत्त प्रसिद्ध केल्यानंतर जिल्हाभरातून गुड इव्हिनिंग सिटीकडे चौकशी करण्यात आली. देऊळगांवराजामधूनही जवळपास शंभरच्या जवळपास कॉल करण्यात आले. नेमके कुठल्या कारणामुळे याठिकाणची नगराध्यक्षपदाची निवडणूक लांबणीवर जावू शकते, अशी विचारणा झाली. गुड इव्हिनिंगने यासंदर्भात विविध सुत्रांकडून माहिती संकलीत केली आहे. आमच्या माहितीनुसार निर्मला बाबुराव खैरनार यांनी नगराध्यक्षपदासाठी नामांकन अर्ज दाखल केला होता. सदर अर्ज संबंधीत निवडणूक निर्णय अधिकारी यांनी या कारणामुळे रद्द केला होता की, सदर अर्जामध्ये नमूद करण्यात आलेल्या सूचकांचा प्रभाग क्रमांक चुकला आहे. निर्मला खैरनार यांचा स्वतंत्र अर्ज होता, त्यात पाच सूचकांची नांवे देण्यात आली होती. या सूचकांचा प्रभाग क्रमंाक टाकण्याऐवजी वार्ड क्रमंाक अर्जामध्ये भरण्यात आला होता. इतर सर्व माहिती बरोबर होती. परंतु उपरोक्त कारण देत अर्ज रद्द केल्यामुळे खैरनार यांनी बुलढाणा जिल्हा न्यायालयात धाव घेतली. ऍड. आशिष शिंगणे यांच्यामार्फत त्यांनी युक्तीवाद केला. न्यायालयाने निर्दीष्ट अवधीत अपील दाखल न झाल्याचे कारण देत सदर अपील फेटाळले. खैरनार यांच्यावतीने युक्तीवाद होता की, २०१६ मध्ये नगराध्यक्षपदाबाबत नमूद नियमावलीमध्ये कायदा १९ (४) नुसार जर अर्जात महत्वाच्या कायदेशीर बाबी नमूद नसतील तरच अर्ज रद्द करावा. सूचकांची नांवे मतदार यादीत आहेत. त्यांचा प्रभाग क्रमांक टाकण्याऐवजी वार्ड क्रमांक टाकल्यामुळे अर्ज रद्द करणे, उमेदवारावर पुढील पांच वर्षांसाठी राजकीय अन्याय करण्यासारखे आहे. सदर प्रकरण जिल्हा न्यायालयातून फेटाळले गेले आहे. परंतु याबाबत अपील दाखल झाले होते, ही माहिती राज्य निवडणूक आयोगाला देण्यात आली आहे. अर्थात सदर अपील किंवा तक्रार खारीज करावी की, पुन्हा नव्याने निवडणूका घ्याव्यात, याबाबत आयोगच निर्णय घेईल. याचा अंतिम निर्णय आज किंवा उद्यापर्यंत जिल्हाधिकारी कार्यालयाला कळविण्यात येईल. यासंदर्भात मात्र ऍड. आशिष नारायणराव शिंगणे यांनी गुड इव्हिनिंग सिटीला स्पष्ट सांगितले आहे की, जर आयोगाने देऊळगांवराजा नगराध्यक्षपदाची निवडणूक पुन्हा नव्याने घेतली नाही तर ते उद्या, सोमवार, १ डिसेंबर रोजी उच्च न्यायालयात अपील दाखल करणार आहेत. जरी आयोगाने देऊळगांवराजा नगर परिषद निवडणूका कायम ठेवल्या आणि पुढे ढकलल्या नाहीत तर उमेदवारही कायम आणि २ डिसेंबरलाच मतदान तसेच ३ डिसेंबरला मतमोजणी निश्चीत आहे. परंतु यात काही बदल झाल्यास नव्याने नामांकन अर्ज दाखल केले जातील. त्यासाठी ४ डिसेंबर तारीख, अर्ज मागे घेण्यासाठीची तारीख १० डिसेंबर आणि २० डिसेंबरला मतदान, २१ डिसेंबरला मतमोजणी होईल. म्हणजे एका आठवड्यानेच निवडणूक पुढे ढकलली जाईल. पण उमेदवारांना नव्याने नामांकन दाखल करावे लागतील.
