बुलढाणा , 17 जानेवारी (गुड इव्हिनिंग सिटी) : प्लॉटची आखणी आणि मोजणी करण्यासाठी सुमारे 80 हजार रुपये लाचेची मागणी करणारा लोणार येथील एक भूकरमापक कर्मचारी अँटी करप्शन ब्युरोच्या जाळ्यात अडकला. पहिला हप्ता 60 हजार रुपये स्वीकारताना 39 वर्षीय उमेश पंडितराव सानप याला अँटी करप्शन ब्युरोने रंगेहात पकडले आहे. सापळ्याची कारवाई आज सायंकाळच्या दरम्यान लोणार बस स्टँड समोरील माऊली गजानन हॉटेलमध्ये झाली. उपाधीक्षक तालुका भूमि अभिलेख कार्यालय लोणार या ठिकाणी उमेश सानप भूकरमापक पदी कार्यरत आहेत. त्यांचे निवासस्थान लोणार शहरातील खटकेश्वर नगर मध्ये आहे. तक्रारदाराच्या प्लॉटची आखणी आणि मोजणी लवकरात लवकर करून देण्यासाठी भूकरमापक सानप याने संबंधित तक्रारदाराला 80 हजार रुपये लाचेची मागणी केली होती. लाच देण्याच्या मनःस्थितीत नसलेल्या तक्रारदाराने अँटी करप्शन ब्युरो कडे सानप यांची तक्रार नोंदविली. सानप लाच मागित असल्याचे स्पष्ट झाल्यानंतर एसीबीच्या पथकाने सापळा रचला. तक्रारदार लाचेच्या रकमेपैकी 60 हजार रुपयांची रक्कम पहिला हप्ता सानप कडे घेऊन आला सानप याने सदर लाचेची रक्कम लोणार बस स्टँड समोरील माऊली गजानन हॉटेलमध्ये स्वीकारली. याच क्षणी त्या ठिकाणी सापारातून बसलेल्या एसीबीच्या पथकाने उमेश सानप याच्यावर झडप टाकली. सानपला रंगेहात पकडून जेरबंद करण्यात आले. सदरची कार्यवाही अँटी करप्शन ब्युरो अमरावती एस पी मारुती जगताप, अप्पर पोलीस अधीक्षक सचिन्द्र शिंदे यांच्या मार्गदर्शनाखाली पोलीस उपअधीक्षक अँटी करप्शन ब्युरो बुलढाणा श्रीमती शीतल घोगरे तसेच पीआय रमेश पवार, सफौ श्याम भांगे हेडकॉन्स्टेबल प्रवीण बैरागी, पोना विनोद लोखंडे, जगदीश पवार, पोकॉ रणजीत व्यवहारे, शैलेश सोनवणे, चालक नितीन शेटे यांच्या पथकाने यशस्वीरित्या पार पाडली. लाचेचा आरोपी उमेश सानप यांच्या विरोधात लोणार पोलीस स्टेशन येथे कलम 7 भ्रष्टाचार प्रतिबंधक अधिनियम 1988 प्रमाणे गुन्हा दाखल करण्यात आला आहे.
