बुलढाणा, 29 नोव्हेंबर (गुड इव्हिनिंग सिटी : बुलढाण्याच्य नाट्य क्षेत्राच्या शिरपेचात मानाचा तुरा रोवल्या गेला आहे. पहिल्या मुख्यमंत्री महाकरंडक स्पर्धेत बुलढाण्याच्या “नामदेव पायरी” या एकांकिकेला प्रथम क्रमांक मिळाला आहे. नागपूरच्या सायंटिफिक हॉल येथे २६ नोव्हेंबर, २०२५ रोजी बुलडाणा येथील माणुसकी मल्टीपरपज फाउंडेशन निर्मित, रविंद्र इंगळे चावरेकर लिखित तसेच विजय सोनोने दिग्दर्शित “नामदेव पायरी” ही एकांकिका मुख्यमंत्री महाकरंडक एकांकिका स्पर्धेत राज्यातून अव्वल ठरत सांघिक सह आठ वैयक्तिक पारितोषिकांची मानकरी ठरली.
ह्या स्पर्धेत सहभागी होण्यासाठीच्या निकषांमध्ये महाराष्ट्रातील कोणत्याही एकांकिका स्पर्धेतुन मागील २ वर्षात प्रथम/व्दितीय पारितोषीक प्राप्त संघ पात्र असल्याची अट होती. बुलढाण्याचा माणूसकी फाउंडेशन निर्मित “नामदेव पायरी” ही एकांकिका अ.भा. नाट्य परिषदेच्या प्राथमिक फेरीत अकोला केंद्रातून प्रथम विजेता असल्याने मानाच्या व चुरशीच्या ह्या स्पर्धेत प्रवेशास पात्र ठरली होती. स्पर्धेत बुलढाण्यासह राज्यभरातील एकुण २१ एकांकिका सहभागी झाल्या होत्या. सर्वच एकांकिका एका पेक्षा एक सरस असल्याने ही स्पर्धा अत्यंत चुरशीची झाली. संत चळवळीकडे पाहण्याचा वेगळा दृष्टिकोन देणारी बुलडाण्याची एकांकीका “नामदेव पायरी” या सर्वांमध्ये अव्वल ठरुन भरघोस पारितोषिकांची मानकरी ठरली. यामध्ये निर्मिती- प्रथम क्रमांकासह , दिग्दर्शन- विजय सोनोने (प्रथम), लेखन रविंद्र इंगळे चावरेकर (प्रथम), संगीत- विजय सोनोने (प्रथम), प्रकाश योजना – लक्ष्मीकांत गोंदकर (प्रथम), अभिनय – प्रसाद दामले (प्रथम), नेपथ्य – पराग काचकुरे (उत्‍तेजनार्थ) अभिनय – गणेश देशमुख (उत्‍तेजनार्थ) अशी भरगच्च पारितोषिके मिळाली आहेत. एकांकिकेमध्ये अभिनेते गणेश देशमुख आणि प्रसाद दामले यांचेसह वेषभुषा आनंद संचेती, रंगभुषा डॉ.स्वप्निल दांदडे व रंगमंच व्यवस्था वैष्णवी प्रेम अहेर, जयेश चौधरी आणि चंद्रशेखर जोशी यांनी सांभाळली. एकांकिकेच्या यशस्वितेसाठी गणेश बंगाळे, शशिकांत इंगळे, राहुल चव्हाण, तुषार काचकुरे, धनंजय बोरकर, राजेश दुतंडे यांनी परिश्रम घेतले. स्पर्धेचे परीक्षण प्रसिध्द अभिनेत्री शकुंतला नरे, प्रसिध्द लेखक आणि नाट्य कलावतंत अशोक समेळ व प्रसिध्द लेखक डॉ. प्रा. सतिश पावडे यांनी केले. संघाला प्रोत्साहित करणारे बुलढाण्याचे नाट्यरसिक व नाट्यकर्मींचे सर्व कलावंतांनी आभार मानले.
