बुलढाणा जिल्ह्यातील विविध ठिकाणच्या ९ प्रभागांमधील निवडणूक पुढे ढकलली
बुलढाणा, ३० नोव्हेंबर (गुड इव्हिनिंग सिटी/रणजीतसिंग राजपूत) ःएका दिवसावर मतदान आलेले असतांना आणि विजयासाठी सर्व डावपेच आखले गेलेले असतांना निवडणूक आयोगाने राज्यातील विविध ठिकाणच्या नगर परिषदांच्या निवडणूकांना ‘ब्रेक’ दिला आहे. आरक्षण तसेच कोर्टात अपीलच्या कारणावरून सर्वोच्च न्यायालयाने राज्य निवडणूक आयोगाला निर्देश दिले आणि त्यानंतर वेगवान घडामोडी होवून आज काही ठिकाणच्या निवडणूकांना पुढे ढकलण्यात आले आहे. गुड इव्हिनिंग सिटीला मिळालेल्या माहितीनुसार यात बुलढाणा जिल्ह्यातील देऊळगाव राजा नगर परिषदेच्या नगराध्यक्ष पदासह सर्वच नगरसेवकांच्या निवडणूकीचा समावेश आहे. तसेच जळगांव जामोद, शेगांव आणि खामगांव या तिन्ही ठिकाणच्या काही प्रभागांमध्ये निवडणूक थांबविली जावू शकते, अशी माहिती निवडणूक विभागातील सुत्रांकडून गुड इव्हिनिंग सिटीला मिळाली आहे.
देऊळगाव राजा नगर परिषदेच्या नगराध्यक्ष पदाचे अपील कोर्टात असल्यामुळे याठिकाणी नगराध्यक्ष पदासह सर्वच नगरसेवक पदासाठीची निवडणूक प्रक्रिया लांबणीवर टाकली जाणार असल्याची माहिती मिळत आहे.
खामगाव नगर परिषदेच्या प्रभाग क्रमांक ५ अ, प्रभाग ७ अ, प्रभाग ९ ब, प्रभाग १६ ब याठिकाणच्या निवडणूका लांबणीवर जाण्याची शक्यता आहे. शेगाव नगर परिषदेच्या प्रभाग क्रमांक ४ अ, प्रभाग ४ ब दोन्ही ठिकाणच्या निवडणूकाना ब्रेक देण्यात आला आहे. तर जळगाव जामोद नगर परिषदेच्या प्रभाग क्रमांक ६ अ, प्रभाग ६ ब आणि प्रभाग ७ ब याठिकाणी सुध्दा निवडणूका लांबणीवर जातील. बुलढाणा जिल्ह्यातील खामगाव, शेगाव, देऊळगाव राजा, आणि जळगाव जामोद या नगर पालिकांचा समावेश आहे. पुढे ढकललेल्या नगरपरिषद आणि नगरसेवक पदाच्या निवडणूक प्रक्रियेमध्ये १० डिसेंबर पर्यंत माघार घेण्यासाठी मुदत, तर २० डिसेंबर मतदान आणि २१ डिसेंबर रोजी मतमोजणी होणार असल्याची माहिती समोर आली आहे.
