पोलीस सज्ज आहेच पण एसआरपीएफ तैनात

बुलढाणा, ३० नोव्हेंबर (गुड इव्हिनिंग सिटी)  ः बुलढाणा जिल्ह्यातील नगरपरिषद निवडणूक-२०२५ शांततेत, पारदर्शक व भयमुक्त वातावरणात पार पडावी यासाठी पोलीस प्रशासनाने तगडा सुरक्षा बंदोबस्त उभा केला आहे. राज्य निवडणूक आयोगाच्या निर्देशानुसार २ डिसेंबर रोजी बुलढाणा, चिखली, मेहकर, देऊळगाव राजा, सिंदखेड राजा, खामगाव, लोणार, शेगाव, नांदूरा, मलकापूर व जळगाव जामोद या ११ नगरपरिषद क्षेत्रांमध्ये मतदान होत आहे. या पार्श्वभूमीवर पोलीस अधीक्षक निलेश तांबे यांच्या नेतृत्वाखाली बुलढाणा जिल्हा पोलीस दलाने व्यापक बंदोबस्त तैनात केला आहे. निवडणुकीदरम्यान सुरक्षेसाठी खालीलप्रमाणे पथके व मनुष्यबळ नियुक्त करण्यात आले आहे.

यामध्ये अपर पोलीस अधीक्षक दोन, उपविभागीय पोलीस अधिकारी ५, पोलीस निरीक्षक २२, पोलीस अधिकारी ९८, पोलीस अंमलदार १२६६, दंगा काबू पथक (आरसीपी) ५ पथके, राज्य राखीव पोलीस बल (एसआरपीएफ) १२ सेक्शन, होमगार्ड १४०० असा तगडा बंदोबस्त असणार आहे. जिल्ह्यातील महत्वाच्या ठिकाणी अतिरिक्त पोलीस बंदोबस्त तैनात करण्याबरोबरच गस्तीसाठी स्वतंत्र पथके नियुक्त करण्यात आली आहेत. तसेच, मतदान प्रक्रियेदरम्यान परिस्थितीवर बारकाईने नजर ठेवण्यासाठी ड्रोन कॅमेर्‍यांचाही वापर करण्यात येणार आहे. गुन्हेगारी पार्श्वभूमी असलेल्या व्यक्तींवर प्रतिबंधात्मक कारवाई करून संभाव्य अराजकता रोखण्यासाठी खबरदारीचे उपाय करण्यात आले आहेत. निवडणुकीपूर्वी पोलीस अधीक्षक निलेश तांबे यांनी सर्व नगरपालिका क्षेत्रांना भेटी देत पोलीस अधिकारी व अंमलदारांना आवश्यक मार्गदर्शन करून सुचना दिल्या आहेत. त्यांच्या निर्देशानुसार सर्व यंत्रणा पूर्ण क्षमतेने कार्यरत असून निवडणूक निष्पक्ष, शांततापूर्ण आणि सुरक्षित वातावरणात पार पाडण्यासाठी पोलीस दल कटिबद्ध आहे.

नगर परिषद सार्वत्रिक निवडणूक २०२५ निपक्षपातीपणे शांतेत व भयमुक्त वातावरणात पार पाडण्यासाठी पोलीस प्रशासन सज्ज असल्याचे प्रतिपादन पोलिस अधीक्षक निलेश तांबे यांनी केले आहे.