बुलढाणा नगर परिषद 8 कोटी ; मोताळा नगरपंचायत 1.75 कोटी
बुलढाणा, 7 ऑगस्ट (गुड इव्हिनिंग सिटी) :- ‘छप्पर फाडके’, हे दोन शब्द बुलढाणा मतदारसंघाला मिळणार्‍या निधीबद्दल अधोरेखीत केले तरी चालतील. कारण एकनाथ शिंदे मुख्यमंत्रीपदी विराजमान झाल्यापासून बुलढाणा मतदारसंघावर त्यांची मेहेरनजर आहे. कारण उद्धव ठाकरे यांना आव्हान देत एकनाथ शिंदे जेव्हा विद्रोह करून बाहेर पडले, तेव्हा त्यांच्यासोबत पहिल्या क्षणापासून आमदार संजय गायकवाड भरभक्कमपणे उभे आहेत. याची जाणिव मुख्यमंत्र्यांना असल्यामुळे जे प्रस्ताव आ. गायकवाड मुख्यमंत्री दरबारी घेवून जात आहे, त्यांना क्षणार्धात हिरवी झेंडी मिळत आहे. जणू मुख्यमंत्री कार्यालयातून निधीची गंगा थेट बुलढाणा मतदारसंघाच्या ‘पैनगंगेला’ येवून मिळत आहे. विशेष म्हणजे आणखीही काही प्रस्ताव आ. गायकवाड यांनी तयार करून ठेवलेले आहेत. त्यांना निधीचा मार्ग लवकरच सुकर होण्याची शक्यता आहे.
बुलढाणा विधानसभा मतदार संघातील बुलढाणा व मोताळा या दोन तालुक्यांना नागरी स्थानिक स्वराज्य संस्थांच्या परिक्षेत्रात अधिसूचित विशिष्ट नागरी सेवा व सुविधा पुरविण्यासाठी तब्बल दहा कोटी रुपयांचा निधी उपलब्ध झाला आहे या निधीच्या अंतर्गत विविध सभागृह व सभा मंडप विकसित केले जाणार आहे सदर निधी उपलब्ध व्हावा याकरिता बुलढाणा विधानसभा मतदारसंघाचे आमदार संजय गायकवाड यांनी शासन दरबारी मागणी केली होती. बुलढाणा विधानसभा मतदारसंघाचे आमदार संजय गायकवाड यांनी मतदारसंघात तील विविध विकास कामाकरिता शासन दरबारी सातत्याने पाठपुरावा करून निधी उपलब्ध करून दिला आहे बुलढाणा नगर परिषद अंतर्गत व मोताळा नगरपंचायत अंतर्गत येणार्‍या नागरी स्थानिक स्वराज संस्थांच्या परिक्षेत्रातील अधिसूचित विशिष्ट नागरी सेवा व सुविधा करिता निधी उपलब्ध करून देण्याची मागणी शासन दरबारी केली होती त्या अनुषंगाने शासनाच्या वतीने बुलढाणा नगरपरिषद करिता तब्बल आठ कोटी 25 लाख रुपयांचा निधी तर मोताळा नगरपंचायत करिता एक कोटी 75 लाख रुपये शासनाच्या वतीने मंजूर करण्यात आले आहे.
बाजूला वरच्या भागात दिलेल्या कोष्टकामध्ये निधीचे वितरण कुठे आणि कोणत्या कामावर केले जाणार आहे, याची माहिती देण्यात आली आहे.
