कोलकाता येथे महिला डॉक्टरवर झालेल्या अत्याचाराचे बुलढाण्यात सुध्दा तीव्र पडसाद उमटले आहे. डॉक्टरांनी हाताला काळ्या फिती बाधून याघटनेचा निषेध नोंदवाला आहे. बुलढाण्यातील डॉक्टरांच्या विविध संघटनांनी जिल्हाधिकारी यांना यासंदर्भात निवेदन दिले आहे. त्या निवेदनात म्हटले आहे की, वैद्यकिय संघटनेचे विविध पदाधिकारी कोलकाता येथील महिला पद्व्युत्तर डॉक्टरवर झालेल्या अमानुष लैगिंक, शारिरीक अत्याचार व निर्घण अमानविय हृत्येचा निषेध करतो. आर.जी. कार महाविद्यालयातील अधिकाऱ्यांनी गुन्ह्याची परिस्थिती अतिशय हलगर्जिपणे आणि निष्काळजीपणे हाताळलेली आहे. तसेच घटनास्थळावरील पुरावे नष्ट करण्याचा प्रयत्न करण्यात आला. ही घटना अत्यंत विकृत आणि मानवतेला काळीमा फासणारी आहे. संपूर्ण जगामध्ये आपल्या देशाची मान अशा घटनांमुळे शरमेने खाली जात आहे. सरकारी आरोग्य व्यवस्थेत सेवेत असणाऱ्या डॉक्टर्स, परिचारिका व इतर आरोग्य सेवा कर्मचाऱ्यांच्या गरजाबांबत शासन अत्यंत उदासिन व असंवेदनशिल आहे. दोषी व्यक्तींना कडक शिक्षा होत नसल्याने अशा घटना दिवसेंदिवस वाढत आहे. कमजोर सरकारी यंत्रणा व राजकिय पाठबळामुळे दोषी व्यक्तींना अभय मिळत आहे. डॉक्टर्स, विशेषतः स्त्री डॉक्टर्स हिंसाचाराला वारंवार बळी पडत आहेत. रुग्णालये आणि कॅम्पसमध्ये त्यांच्या सुरक्षेच्या तरतूदी करण्यामध्ये व्यवस्थापन कमी पडत आहे. बऱ्याचवेळा दवाखान्याच्या परिसरात अनावश्यक जमाव मोठ्या प्रमाणावर असतो, दवाखान्याबाहेरील गेटवर सुरक्षा व्यवस्था कडेकोट नसते, हॉस्पीटलच्या जवळपास २०० मिटर परिक्षेत्रात अंमलीपदार्थ विक्रीची दुकाने, स्टॉल, प्रतिष्ठाने नसावित, याशिवाय अवैध धंद्यावरही बंदी असली पाहिजे परंतु अनेक ठिकाणी या नियमांचे, संकेतांचे पालन होतांना दिसत नाही याचे दुरगामी दुष्परीणामातून गुन्हेगारी घटना घडतात. या निवेदनाव्दारे दोषी व्यक्तीवर भारतीय दंड संहितेमध्ये असलेल्या कठोरात कठोर शिक्षा देण्यात यावी व दोषींना अभय देणाऱ्या व्यक्तिवर देखील योग्य ती करवाई करण्यात यावी. या डॉक्टरांवर वारंवार होणारे प्राणघातक हल्ले व वरील नमूद घटना भविष्यात होऊ नये या संदर्भात शासनमार्फत कठोरात कठोर कारवाई व समाज प्रबोधन करण्यात यावे अशी मागणी डॉक्टरांनी निवेदनाव्दारे केली आहे. या निवेदनावर बुलढाणा आयएमएचे अध्यक्ष डॉ. अजित शिरसाट, सचिव डॉ. गजेंद्र निकम, एनआयएमए चे अध्यक्ष डॉ. चंद्रकिरण पवार, सचिव डॉ. जयदिप वाघ, होमिओपॅथी चे अध्यक्ष डॉ. दुर्गासिंग जाधव, सचिव डॉ. सागर जोशी, आयडीएचे अध्यक्ष डॉ. शरद जुमडे, सचिव डॉ. सचिन किनगे, धनजंय अंभोरे, गजानन शिंदे, अॅड. सतिशचंद्र रोठे आदिंच्या सह्या आहेत.
