मराठा क्रांती मोर्चाने स्पष्ट केली भूमिका !
बुलढाणा, 7 नोव्हेंबर (गुड इव्हिनिंग सिटी) :- मराठा आरक्षणासाठी लढा देणारे संघर्ष योद्धा मनोज जरांगे पाटील यांनी बुलढाणा जिल्ह्यात कुठल्याही उमेदवारास पाठिंबा दिला नसल्याचे मराठा क्रांती मोर्चा ने दिलेल्या प्रसिद्धी पत्रकात म्हटले आहे. काही उमेदवार याबाबत संभ्रम निर्माण करीत असल्याच्या पार्श्वभूमीवर मराठा क्रांती मोर्चा ने आपली भूमिका स्पष्ट केली आहे.
सध्या विधानसभेचे वारे वाहत आहे.ठिकाणी उमेदवार उभे राहिले आहेत. मधल्या काळात उमेदवार उभे करण्याची भूमिका मनोज जरांगे पाटील यांनी घेतली होती. जे लोक मराठा आरक्षणाला पाठिंबा देतील,समर्थन करतील अशांना निवडणुकीच्या रिंगणात उतरवण्याचे त्यांनी म्हंटले होते. मात्र प्राप्त राजकीय परिस्थिती पाहता हा निर्णय त्यांनी मागे घेतलेला आहे. व्यापक समाज हिताची भूमिका घेण्याचा निर्णय त्यांनी घेतला आहे. त्यामुळे कोणी स्टॅम्पवर प्रतिज्ञा लेख करून दिला, व समर्थनाचे पत्र सोशल मीडियावर व्हायरल करीत असले तरी वस्तुस्थिती वेगळी आहे. मनोज जरंगे पाटील यांचा आपल्याला पाठिंबा आहे असे कोणी म्हणत असले तरी अश्या उमेदवारांचा आणि मनोज जरांगे पाटील यांचा कुठलाही अर्थार्थी संबंध राहणार नसल्याचे त्यांनीच अंतरवाली सराटी येथे माध्यमांशी बोलताना स्पष्ट केले आहे. राजकीय भूमिका त्यांनी पूर्णतः मागे घेतली आहे. बुलढाणा जिल्ह्यामध्ये सात विधानसभा मतदारसंघात वेगवेगळे अनेक उमेदवार उभे आहे. यापैकी कुठल्याही उमेदवारास मनोज जरांगे पाटील यांचा पाठिंबा व समर्थन नसल्याचे पत्रक मराठा क्रांती मोर्चाचे समन्वयक (बुलढाणा , जळगावजामोद, खामगाव, मेहकर, चिखली, सिंदखेड राजा, मलकापूर, नांदुरा) यांनी पत्रक दिले आहे.
बुलढाणा विधानसभेचे उमेदवार अ‍ॅड.सतिशचंद्र रोठे यांनी मराठायोध्दा मनोज जरांगे पाटील यांचे बॅनर तसेच त्यांच्या प्रचारपत्रकावर फोटो प्रकाशित केलेले आहे. अशावेळी मराठा क्रांती मोर्चाकडून स्पष्टपणे यासंदर्भात जाहीरपत्रकाव्दारे कुणालाच पाठिंबा नसल्याचे घोषीत केल्यामुळे रोठेंची अडचण वाढू शकते.
